ایشیا کپ: بنگلہ دیش نے افغانستان کو شکست دے دی، سپر فور میں جانے کے امکانات بڑھ گئے

بنگلہ دیش نے گروپ بی کے میچ میں افغانستان کو آٹھ رنز سے شکست دے دی جس کے بعد ٹیم کے ایشیا کپ 2025 کے اگلے مرحلے میں رسائی کی امکانات بڑھ گئے ہیں۔

افغانستان سپر فور میں جگہ بنانے اور بنگلہ دیش کو باہر کرنے کے قریب پہنچ گیا تھا، لیکن منگل کو 155 رنز کے ہدف کے تعاقب میں کامیاب نہ ہو سکا۔

ایشیا کپ کے میچ میں بنگلہ دیش نے افغانستان کو آٹھ رنز سے شکست دی۔ بنگلہ دیش کے باؤلرز نے شاندار کارکردگی دکھائی، خاص طور پر مستفیض الرحمٰن، نسیم احمد اور تسکین احمد نے اہم وکٹیں لے کر افغانستان کی اننگز روکنے میں کامیاب رہے۔

افغانستان کے لیے صرف رحمٰن اللہ گرباز اور عظمت اللہ عمرزئی نے کچھ بہتر کھیل پیش کیا، جبکہ آخر میں کپتان راشد خان نے تیز رنز بنا کر جیتنے کی امید پیدا کی، لیکن ان کے آؤٹ ہوتے ہی افغانستان میچ نہ جیت سکا۔

افغان ٹیم ہدف کے قریب پہنچی لیکن آخر میں 145 رنز بنا کر آل آؤٹ ہوگئی۔

بنگلہ دیش کی جانب سے تنزیل حسن سب سے نمایاں بیٹر رہے جنہوں نے نصف سنچری بنا کر ٹیم کو اچھا ہدف دینے میں مدد دی۔ اسپنر نور احمد کے چند چھکوں کے باوجود افغانستان کی ٹیم 20 اوورز میں 145 رنز بنا کر آؤٹ ہوگئی۔

اس سے قبل بنگلہ دیش کی جانب سے تنزیل حسن نے 31 گیندوں پر نصف سنچری (52 رنز) سکور کی اور ٹیم کو 20 اوورز میں 5 وکٹوں پر 154 رنز کے چیلنجنگ ہدف تک پہنچایا۔

راشد خان اور نور احمد نے افغانستان کی طرف سے دو، دو وکٹیں حاصل کیں۔

بنگلہ دیش اپنے تینوں گروپ میچ کھیل چکا ہے اور اب جمعرات کو افغانستان اور سری لنکا کے درمیان ہونے والے اہم میچ کے نتیجے کا انتظار کرے گا۔ سری لنکا چار پوائنٹس کے ساتھ سرفہرست ہے جبکہ بنگلہ دیش بھی چار پوائنٹس کے ساتھ دوسرے نمبر پر آگیا ہے۔ بنگلہ دیشی ٹیم کو امید ہے کہ سری لنکا افغانستان کو شکست دے گا تاکہ ان کے لیے سپر فور میں رسائی کا راستہ صاف ہو سکے۔ اگر افغانستان جیت گیا تو پھر فیصلہ نیٹ رن ریٹ پر ہوگا۔