پاکستان کی سرکاری میڈیا کے مطابق منگل کو پاکستان سے ایک خصوصی چارٹرڈ طیارہ 100 ٹن امدادی سامان لے کر مصر کے الاریش انٹرنیشنل ائرپورٹ پہنچ گیا۔
یہ طیارہ لاہور سے روانہ ہوا جو پاکستان کے نیشنل ڈیزاسٹر مینجمنٹ اتھارٹی (این ڈی ایم اے) نے مقامی خیراتی تنظیم الخدمت فاؤنڈیشن کے تعاون سے بھیجا ہے۔
ریڈیو پاکستان کے مطابق امدادی سامان میں روزمرہ زندگی کی ضروری اشیا شامل ہیں۔
امدادی سامان مصر کے ریڈ کریسنٹ سوسائٹی کے حوالے کیا گیا تاکہ اسے غزہ کے عوام تک پہنچایا جا سکے۔
سرکاری میڈیا کے مطابق ’مزید انسانی اور امدادی سامان بھی پہنچایا جارہا ہے جو ہفتوں میں غزہ کے بھائیوں تک پہنچ جائے گا‘۔
اسرائیل کی غزہ پر جنگ شروع ہونے کے بعد اکتوبر 2023 سے پاکستان نے فلسطینیوں کے لیے امدادی سامان بھیجا ہے۔ تقریباً دو سال تک جاری جنگ کے دوران کم از کم 69 ہزار فلسطینی غزہ میں ہلاک ہوچکے ہیں۔
اسرائیلی افواج نے جنگ کے دوران اسکولوں، ہسپتالوں اور تعلیمی اداروں کو بمباری کا نشانہ بنایا، جس میں بڑی تعداد میں خواتین اور بچے ہلاک ہوئے۔
اسرائیل نے غزہ تک انسانی اور امدادی سامان کی رسائی کو بھی روکا، جس کی وجہ سے اس گنجان آباد علاقے میں بھوک اور بیماریاں پھیل گئیں، قبل اس کے کہ امریکہ کی وساطت سے اس سال ایک نازک جنگ بندی عمل میں آئی۔
