کچھ رپورٹس کے مطابق متحدہ عرب امارات صرف سرکاری اور سفارتی کے حامل پاکستانیوں کو ویزے جاری کررہا ہے۔
پچھلے روز ڈان اخبار میں ایک خبر رپورٹ ہوئی کہ ایڈیشنل سیکرٹری داخلہ سلمان چوہدری نے سینیٹ کمیٹی کو بتایا ہے کہ متحدہ عرب امارات (یو اے ای) پاکستانیوں کو ویزے جاری نہیں کر رہا اور حالیہ دنوں میں بہت کم ویزے بھی ’بہت مشکل‘ کے بعد جاری کیے گئے ہیں۔
انہوں نے یہ بھی بتایا کہ فی الحال یو اے ای صرف نیلے پاسپورٹ اور ڈپلومیٹک پاسپورٹ رکھنے والوں کو ویزے جاری کر رہا ہے۔
اسی دوران، یو اے ای کے سفارت خانے کے ایک سینئر سفارتکار نے سوشل میڈیا پر پھیلنے والی اس افواہ کو مسترد کیا کہ پاکستانیوں پر ویزا پابندی عائد ہے۔
’مبینہ پابندی‘ سے متعلق سوال کے جواب میں انہوں نے ڈان کو بتایا کہ ’پاکستانی شہریوں پر ویزوں کی کوئی پابندی نہیں ہے۔‘
سیکریٹری نے یہ انکشاف سینیٹ کی فنکشنل کمیٹی برائے انسانی حقوق کے اجلاس کے دوران کیا۔ انہوں نے مزید بتایا کہ سعودی عرب اور یو اے ای نے ’پاکستانی پاسپورٹ پر مکمل پابندی لگانے کے بہت قریب تھے لیکن آخری مرحلے میں رُک گئے۔ اگر پابندی لگا دی گئی تو اسے ہٹوانا مشکل ہوگا۔‘
سینیٹر سمینہ ممتاز زہری نے بھی وزارتِ داخلہ کے اٖفسر بتایا کہ یہ پابندی اُن خدشات کے باعث ہے کہ لوگ یو اے ای جا کر ’جرائم میں ملوث ہو جاتے ہیں۔‘
یو اے ای کے سفیر کی ویزا سہولت کاری کے اقدامات سے آگاہی
دوسری جانب، پاکستان میں متحدہ عرب امارات کے سفیر سالم ایم سالم الباب ال ذعابی نے جمعرات کو وزیرِ خزانہ محمد اورنگزیب سے ملاقات میں پاکستانیوں کے لیے ’یو اے ای ویزا سہولت کاری اصلاحات‘ شیئر کیں۔
وزارت کے مطابق ملاقات میں جن نئے اقدامات پر بات ہوئی، ان میں آن لائن ویزا پروسیسنگ، پاسپورٹ پر اسٹمپنگ کے بغیر ای ویزاز، اور سسٹم ٹو سسٹم لنکیجز شامل ہیں۔
بیان میں مزید کہا گیا کہ پاکستان میں نئے کھولے گئے یو اے ای ویزا سینٹر میں روزانہ تقریباً 500 ویزے پروسیس کیے جا رہے ہیں، جو سفیر کی جانب سے بتائی گئی مزید اصلاحات کا حصہ ہیں۔
ماضی میں یو اے ای ویزا مسائل
جولائی کے شروع میں بھی پاکستانی شہریوں کو یو اے ای ویزا کے مسائل کا سامنا کرنا پڑا تھا، جس کے بعد وزیرِ داخلہ محسن نقوی نے یہ معاملہ اپنے یو اے ای ہم منصب کے سامنے اٹھایا۔
11 جولائی کی ملاقات میں یو اے ای کے لیفٹیننٹ جنرل شیخ سیف بن زاید النہیان نے محسن نقوی کو پاکستانی شہریوں کے ویزوں میں تیزی لانے کے لیے ’مکمل تعاون‘ کی یقین دہانی کرائی، جب کہ پاکستانی وزیر نے ویزا پالیسیوں میں ’نرمی‘ کی درخواست کی۔
اپریل میں پاکستان میں یو اے ای کے سفیر حمد عبید ابراہیم سالم الزعابی نے اعلان کیا تھا کہ ویزا سے متعلق مسائل حل ہو چکے ہیں اور پاکستانی اب پانچ سالہ ویزا بھی حاصل کر سکتے ہیں۔
یہ اعلان اُس وقت سامنے آیا جب جنوری میں سینیٹ کی قائمہ کمیٹی برائے اوورسیز پاکستانیوں کو بتایا گیا تھا کہ یو اے ای کے کچھ ویزے ’غیر رسمی طور پر بند‘ کر دیے گئے ہیں۔
اوورسیز ایمپلائمنٹ پروموٹر عاصم بیگ نے کمیٹی کو بتایا تھا کہ یو اے ای حکومت کو اس بات پر تحفظات ہیں کہ پاکستان سے جانے والے کچھ افراد ’ورک ویزا کے بجائے وزٹ ویزا‘ لے کر جاتے ہیں اور پھر ملک میں بھیک مانگنے لگتے ہیں۔
تاہم کمیٹی کے چیئرمین سینیٹر ذیشان خانزادہ نے واضح کیا تھا کہ پاکستانیوں کے لیے ورک ویزا پر کوئی پابندی نہیں۔
