بِٹ کوائن کی قیمت میں 29 فیصد اضافے کی وجہ سے دیگر کرپٹو کرنسیز کی بھی قیمتیں بڑھ گئی ہیں۔
دنیا کی سب سے مشہور کرپٹو کرنسی بِٹ کوائن کی قیمت پہلی بار 1 لاکھ 20 ہزار ڈالر سے اوپر چلی گئی ہے، جو کرپٹو مارکیٹ کے لیے ایک بڑی پیش رفت ہے۔
پیر کے روز ایشیا میں ٹریڈنگ کے دوران بِٹ کوائن نے 1,21,207 ڈالر کی ریکارڈ سطح کو چھوا، بعد میں تھوڑی کمی کے ساتھ 1,21,015 ڈالر پر ٹریڈ ہو رہا تھا۔
اس تیزی کی ایک وجہ یہ بھی ہے کہ اس ہفتے امریکہ میں کرپٹو کرنسی سے متعلق قوانین پر بحث شروع ہو رہی ہے۔ ان قوانین کا مقصد کرپٹو انڈسٹری کو ایک واضح نظام دینا ہے، جس کا مطالبہ سرمایہ کار کافی عرصے سے کر رہے تھے۔
امریکی صدر ڈونلڈ ٹرمپ بھی کرپٹو کے حق میں ہیں جنہوں نے خود کو ’کرپٹو صدر‘ کہا ہے اور چاہتے ہیں کہ قوانین کو انڈسٹری کے فائدے میں بدلا جائے۔
ماہرین کا کہنا ہے کہ بڑے ادارے کرپٹو میں دلچسپی لے رہے ہیں، قیمتیں مزید بڑھنے کی امید ہے اور ٹرمپ کی حمایت بھی ہے۔ یہی عوامل بِٹ کوائن کی قیمت کو اوپر لے جا رہے ہیں۔
ایک تجزیہ کار کے مطابق بِٹ کوائن جلد 1 لاکھ 25 ہزار ڈالر تک بھی جا سکتا ہے۔
اس سال اب تک بِٹ کوائن کی قیمت میں 29 فیصد اضافہ ہو چکا ہے اور دیگر کرپٹو کرنسیز جیسے ایتھیر، XRP اور سولانا کی قیمتیں بھی بڑھی ہیں۔
ایتھیر 5 ماہ کی بلند ترین سطح 3 ہزار 50 ڈالر پر پہنچا، XRP اور سولانا میں بھی 3 فیصد اضافہ ہوا جبکہ پوری کرپٹو مارکیٹ کی قدر اب 3.78 ٹریلین ڈالر ہو گئی ہے
