بنگلہ دیش کی ایک عدالت نے جمعرات کے روز سابق وزیرِاعظم شیخ حسینہ کو کرپشن کے مقدمے میں 21 سال قید کی سزا سنا دی۔
یہ فیصلہ ایک ایسے وقت میں آیا ہے جب ایک ہفتہ قبل ہی انہیں انسانیت کے خلاف جرائم کے الزام میں سزائے موت سنائی گئی تھی۔78 سالہ حسینہ اس وقت انڈیا میں مقیم ہیں اور انہوں نے بنگلہ دیش واپس آنے کے عدالتی احکامات کو تسلیم کرنے سے انکار کر دیا ہے۔
انہیں 17 نومبر کو عدم موجودگی میں پھانسی کی سزا سنائی گئی تھی، یہ سزا گزشتہ سال طلبہ کی قیادت میں ہونے والی بغاوت کے خلاف خونی کریک ڈاؤن کے حکم دینے پر سنائی گئی، جس کے نتیجے میں بالآخر وہ اقتدار سے ہٹ گئیں۔
تاہم اینٹی کرپشن کمیشن نے سابق وزیرِاعظم کے خلاف ڈھاکا کے نواحی علاقے میں قیمتی پلاٹس پر قبضے سے متعلق تین الگ مقدمات بھی دائر کیے تھے۔
ڈھاکا ٹربیون کے مطابق ان تینوں مقدمات میں شیخ حسینہ کو سات، سات سال قید کی سزا سنائی گئی ہے۔ عدالت نے دیگر کئی ملزمان کو بھی مختلف مدت کی سزائیں سنائی ہیں۔
جج کے مطابق شیخ حسینہ نے ایسے اقدامات کیے جن سے یہ ظاہر ہوتا ہے کہ وہ اپنے عہدے اور اختیارات کو اپنا ذاتی حق سمجھتی تھیں۔ ان کا رویہ ایسا تھا جیسے وہ سرکاری زمین اور ریاستی وسائل کو اپنی ذاتی ملکیت سمجھتی ہوں۔
جج نے یہ بھی کہا کہ ’انہوں نے سرکاری طریقہ کار میں دھاندلی کرکے اپنے اور اپنے قریبی خاندان والوں کو فائدہ پہنچایا اور ان تمام باتوں سے ایک مسلسل کرپٹ ذہنیت کا اظہار ہوتا ہے‘۔
جج کا کہنا ہے کہ شیخ حسینہ نے اپنے عہدے کا غلط استعمال کیا اور سرکاری وسائل کو ذاتی فائدے کے لیے استعمال کیا۔
شیخ حسینہ کے امریکہ میں مقیم بیٹے سجیـب واجد اور بیٹی سائما واجد کو پانچ، پانچ سال قید کی سزا سنائی گئی ہے۔
5 اگست 2024 کو حسینہ ہیلی کاپٹر کے ذریعے بنگلہ دیش سے فرار ہوگئی تھیں، جب ان کی آمرانہ حکومت کے خلاف ہفتوں سے جاری طلبہ تحریک عروج پر تھی۔
سرکاری وکیل خان معین الحق نے کہا کہ وہ کرپشن کیسز کے فیصلے کے خلاف اپیل کریں گے۔
انہوں نے اے ایف پی کو بتایا ’ہم فیصلے سے مطمئن نہیں، کیونکہ ہم نے زیادہ سے زیادہ سزا کی استدعا کی تھی۔ ہم اپنے مؤکل، اینٹی کرپشن کمیشن سے، مشاورت کے بعد آئندہ لائحہ عمل کا فیصلہ کریں گے۔‘
ڈھاکا ٹریبیون کے مطابق ان تینوں مقدمات میں کل 47 ملزمان شامل ہیں، جن میں 23 افراد کے نام درج ہیں۔
پہلے مقدمے میں شیخ حسینہ سمیت 12 افراد نامزد تھے، دوسرے میں شیخ حسینہ اور سجیـب سمیت 17 افراد، اور تیسرے مقدمے میں شیخ حسینہ اور ان کی بیٹی سائما سمیت 18 افراد کو سزا سنائی گئی۔
