پاکستان کے صوبے پنجاب کی وزیرِ اطلاعات عظمیٰ بخاری کا کہنا ہے کہ دریائے ستلج میں ایک اور بڑا سیلابی ریلا آ رہا ہے۔ انڈیا نے پیر کو دریائے ستلج میں ایک اور سیلابی ریلے سے آگاہ کر دیا ہے۔
پاکستان کے صوبے پنجاب کی وزیرِ اطلاعات عظمیٰ بخاری کا کہنا ہے کہ دریائے ستلج میں ایک اور بڑا سیلابی ریلا آ رہا ہے۔ انڈیا نے پیر کو دریائے ستلج میں ایک اور سیلابی ریلے سے آگاہ کر دیا ہے۔
پنجاب کی صوبائی ڈیزاسٹر مینجمنٹ اتھارٹی (پی ڈی ایم اے) نے دریائے ستلج میں گنڈا سنگھ کے مقام پر اونچے درجے کے سیلاب کا الرٹ جاری کر دیا ہے۔
صوبائی وزیرِ اطلاعات کا کہنا تھا کہ اب سیلاب جنوبی پنجاب کے علاقوں کی طرف بڑھ رہا ہے اور وہاں بھی نقصانات کا اندیشہ ہے۔
اس وقت دریائے راوی، ستلج اور چناب تینوں دریاؤں میں سیلابی صورتِ حال برقرار ہے اور مختلف مقامات سے انتہائی اونے درجے کے سیلابی ریلے گزر رہے ہیں۔
حکام کا کہنا ہے کہ دریائے چناب میں سیلابی ریلا تریموں ہیڈ ورکس سے گزر رہا ہے۔ تریموں ہیڈ پر اس وقت پانی کا بہاؤ پانچ لاکھ 50 ہزار کیوسک ہے جو آج شام تک بڑھ کر سات لاکھ کیوسک تک پہنچ جائے گا۔
پی ڈی ایم اے پنجاب کے ڈائریکٹر جنرل عرفال علی کاٹھیا کا کہنا ہے کہ دو سے تین ستمبر کے دوران تقریبا 10 لاکھ کیوسک پانی ہیڈ پنجند پر پہنچے گا۔
پنجند کے مقام پر دریائے راوی، ستلج اور چناب مل جاتے ہیں اور پھر یہ سارا پانی دریائے سندھ میں شامل ہو جاتا ہے۔ اس بڑے سیلابی ریلے کی وجہ سے سندھ میں بھی سیلاب کا خدشہ ہے جس کے لیے صوبائی حکومت کی جانب سے پیشگی اقدامات کیے جا رہے ہیں۔
