پاکستان فوج کے ترجمان ادارے آئی ایس پی آر نے بتایا ہے کہ خیبرپختونخوا کے ضلع کرم میں بدھ کو کیے گئے ایک آپریشن کے دوران ایک فوجی افسر سمیت چھ اہلکار ہلاک ہو گئے ہیں جب کہ بلوچستان میں آپریشن کے دوران 18 دہشت گردوں کو ہلاک کر دیا گیا ہے۔
آئی ایس پی آر کے مطابق کیپٹن نعمان سلیم میڈیکل آفیسر تھے جنھوں نے اپنی ڈیوٹی کے ساتھ ساتھ 'بہادری سے شدت پسندوں کا مقابلہ کیا۔'
دوسری جانب بلوچستان میں 28 اور 29 اکتوبر کو ہونے والے آپریشنز میں 18 دہشت گردوں کو ہلاک کر دیا گیا ہے۔
آئی ایس پی آر کا کہنا ہے کہ کوئٹہ ڈویژن کے علاقے میں واقع چلتن کی پہاڑیوں میں دہشت گردوں کی موجودگی کی اطلاع پر آپریشن کیا گیا۔ آپریشن کے دوران شدید فائرنگ کے تبادلے میں 14 دہشت گرد ہلاک ہوئے۔
آئی ایس پی آر کے مطابق ضلع کیچ کے علاقے بلیدا میں بھی انٹیلی جینس کی بنیاد پر ایک آپریشن کیا گیا جس میں دہشت گردوں کا ٹھکانہ تباہ کر دیا گیا جب کہ چار دہشت گرد بھی ہلاک ہوئے۔
