ترکیہ کے شہر استنبول میں غزہ سے متعلق ایک اجلاس میں عرب اور اسلامی ممالک کے وزرائے خارجہ نے غزہ سے اسرائیلی فوج کے فوری انخلا کا مطالبہ کیا ہے۔
پیر کو ہونے والے اس اجلاس میں میزبان ترکیہ کے علاوہ پاکستان، انڈونیشیا، قطر، سعودی عرب اردن اور متحدہ عرب امارات کے رہنماؤں نے شرکت کی۔
شرکا نے اسرائیل کی جانب سے غزہ جنگ بندی معاہدے کی خلاف ورزی اور حملے جاری رکھنے کی مذمت بھی کی۔
پاکستان کی وزراتِ خارجہ سے جاری بیان میں کہا گیا ہے کہ اجلاس کے دوران پاکستان کے نائب وزیرِ اعظم اور وزیرِ خارجہ اسحاق ڈار نے عرب اور اسلامی وزرائے خارجہ کے ساتھ غزہ میں پائیدار جنگ بندی اور پائیدار امن کے لیے آئندہ کے لائحہ عمل پر غور کیا۔
وزارتِ خارجہ کے مطابق تمام رہنماؤں نے مشترکہ طور پر مقبوضہ فلسطینی علاقے سے اسرائیلی فوج کے انخلا کا مطالبہ کیا اور غزہ کی تعمیر نو پر زور دیا۔
اجلاس میں فلسطینیوں کے لیے فوری انسانی امداد کا بھی مطالبہ کیا گیا اور غزہ جنگ بندی معاہدے کی اسرائیل کی جانب سے خلاف ورزیوں کی مذمت کی گئی۔
وزارتِ خارجہ کے مطابق پاکستان نے ایک بار پھر اپنا مؤقف دہرایا کہ اقوامِ متحدہ اور اسلامی تعاون تنظیم کی قراردادوں کے مطابق 1967 سے قبل کی سرحدوں پر مبنی ایک آزاد اور خودمختار فلسطینی ریاست کا قیام عمل میں لایا جائے جس کا دارالحکومت القدس الشریف ہو۔
