بنگلہ دیش کی فوج نے کہا ہے کہ حادثہ جہاز میں مکینیکل خرابی کی وجہ سے پیش آیا۔ پائلٹ نے جہاز کو آبادی سے دور لے جانے کی کوشش کی مگر جہاز دو منزلہ عمارت سے ٹکرا گیا۔
بنگلہ دیش میں ایئرفورس کا تربیتی جہاز کالج کی عمارت پر گرنے کے واقعے میں ہلاکتوں کی تعداد 27 ہو گئی ہے جن میں 25 بچے ایک ٹیچر اور ایک پائلٹ شامل ہیں۔
حکام کے مطابق حادثے میں 171 افراد زخمی ہوئے جن میں سے 78 اسپتالوں میں زیرِ علاج ہیں۔
واقعہ پیر کی دوپہر ڈھاکہ کے علاقے اترا میں پیش آیا تھا۔ بنگلہ دیش کی فوج کے مطابق گرنے والا تربیتی جہاز چینی ساختہ ’ایف سیون بی جی آئی‘ تھا جس نے ڈھاکہ کی ایک ایئربیس سے اڑان بھری تھی اور یہ معمول کی تربیتی پرواز پر تھا۔ جہاز نے مقامی وقت کے مطابق ایک بج کر چھ منٹ پر پرواز کی اور تقریباً ڈیڑھ بجے یہ مائل اسٹون نامی اسکول اور کالج کے کیمپس پر گر کر تباہ ہو گیا۔
واضح رہے کہ ایف سیون بی جی آئی چین کے چینگڈو جے سیون یا ایف سیون طیاروں کی سیریز کا سب سے ایڈوانسڈ جہاز ہے۔ بنگلہ دیش نے 2011 میں چین سے 16 ایسے طیارے خریدے تھے جو 2013 تک اسے مل گئے تھے۔
بنگلہ دیش کی فوج نے کہا ہے کہ حادثہ جہاز میں مکینیکل خرابی کی وجہ سے پیش آیا۔ پائلٹ نے جہاز کو آبادی سے دور لے جانے کی کوشش کی مگر جہاز دو منزلہ عمارت سے ٹکرا گیا۔ ایئرفورس کے اعلیٰ حکام حادثے کی وجوہات کی تحقیقات کریں گے۔
یہ بنگلہ دیش کی حالیہ تاریخ کا سب سے ہلاکت خیز جہاز حادثہ ہے۔ اس سے قبل 2008 میں بھی ایک ایف سیون جہاز تباہ ہوا تھا جس میں پائلٹ ہلاک ہو گیا تھا۔
حالیہ واقعے کے عینی شاہد ایک ٹیچر مسعود طارق نے رائٹرز کو بتایا کہ میں نے اپنے بچوں کو پک کیا اور جب میں گیٹ کی طرف گیا تو مجھے ایسا محسوس ہوا کہ جیسے پیچھے سے کوئی چیز آئی ہے اور فوراً ہی زوردار دھماکے کی آواز آئی۔ ان کے بقول جب میں نے پیچھے مڑ کر دیکھا تو مجھے صرف دھواں اور آگ نظر آئی۔
بنگلہ دیش کی عبوری حکومت کے سربراہ محمد یونس نے حادثے پر افسوس کا اظہار کرتے ہوئے کہا ہے کہ واقعے کی تحقیقات کے لیے تمام ضرورت اقدامات کیے جائیں گے اور متاثرہ افراد کی مدد کو یقینی بنایا جائے گا۔
ان کے بقول ایئرفورس، طلبہ، والدین، اساتذہ اور دیگر اسٹاف کا اس حادثے میں جو نقصان ہوا، اس کی تلافی ممکن نہیں۔
یاد رہے کہ انڈیا میں گزشتہ ماہ ایئرانڈیا کا جہاز بھی ایک میڈیکل کالج کے ہاسٹل پر گر کر تباہ ہوا تھا جس میں جہاز میں سوار 241 افراد کے ساتھ ہاسٹل میں موجود 19 افراد بھی ہلاک ہوئے تھے۔
