لائیو پیج: 13 مئی 2025
ینی شفق اردو کے لائیو پیج میں خوش آمدید
کشمیر پر ٹرمپ کی ثالثی کی پیشکش نے انڈیا کو مشکل میں ڈال دیا
انڈیا ہمیشہ سے مسئلہ کشمیر پر کسی تیسرے ملک کی مداخلت یا ثالثی کے خلاف رہا ہے۔ لیکن امریکی صدر ڈونلڈ ٹرمپ نے حالیہ انڈیا پاکستان کشیدگی کے دوران اعلان کیا کہ انڈیا اور پاکستان نے امریکہ کی مدد سے مکمل جنگ بندی پر اتفاق کیا ہے۔ پھر انہوں نے کہا کہ وہ کشمیر کے مسئلے کو حل کرنے میں دونوں ملکوں کی مدد کرنا چاہتے ہیں۔
ٹرمپ کا یہ بیان انڈیا کے لیے حیران کن ہے کیونکہ انڈیا ہمیشہ کشمیر کو اپنا اندرونی معاملہ سمجھتا ہے اور کسی دوسرے ملک کو اس پر بات کرنے کی اجازت نہیں دیتا۔ کشمیر کا مسئلہ 1947 سے چل رہا ہے، جب پاکستان اور انڈیا نے آزادی حاصل کی تھی۔ دونوں ممالک کشمیر کو اپنا حصہ سمجھتے ہیں اور آج کشمیر ایک حصے پر انڈیا اور دوسرے حصے پر پاکستان کا کنٹرول ہے۔
دونوں ملکوں نے مسئلہ کشمیر پر کئی بار بات چیت کی لیکن کوئی مستقل حل نہیں نکلا۔ اب ٹرمپ کی مداخلت کی بات نے انڈیا کو ایک مشکل صورتحال میں ڈال دیا ہے۔ انڈیا نے پاکستان پر الزام لگایا ہے کہ وہ پہلگام حملے میں ملوث ہے، لیکن پاکستان نے الزامات کی تردید کرتے ہوئے غیر جانبدار تحقیقات کا مطالبہ کیا ہے۔
پانی کا مسئلہ حل نہ ہوا تو انڈیا-پاکستان سیزفائر خطرے میں پڑ سکتا ہے: اسحاق ڈار
وزیر خارجہ اسحاق ڈار نے کہا ہے کہ اگر انڈیا اور پاکستان کے درمیان پانی کا تنازع آئندہ مذاکرات میں حل نہ ہوا تو دونوں ملکوں کے درمیان جنگ بندی (سیزفائر) خطرے میں پڑ سکتی ہے۔
امریکی نشریاتی ادارے سی این این کو دیے گئے انٹرویو میں انہوں نے خبردار کیا کہ پانی کا مسئلہ حل نہ ہونا ’جنگ کے مترادف ہوگا‘۔
اسحاق ڈار نے کہا کہ کشمیر اس پورے علاقے میں بدامنی کی اصل وجہ ہے اور وہاں کے لوگوں کو اپنا فیصلہ خود کرنے کا حق ملنا چاہیے۔
انٹر سروسز پبلک ریلیشنز (آئی ایس پی آر) کے مطابق انڈین حملوں کے خلاف پاکستان کا دفاع کرتے ہوئے 11 فوجی جوان ہلاک اور 78 زخمی ہوئے ہیں۔
پاک فوج کے مطابق انڈین حملوں میں 40 شہری بھی مارے گئے جن میں 7 خواتین اور 15 بچے شامل ہیں، جبکہ 121 شہری زخمی ہوئے۔
’شہید اہلکاروں میں نائیک عبد الرحمان، لانس نائیک دلاور خان، لانس نائیک اکرام اللہ، نائیک وقار خالد، سپاہی محمد عدیل اکبر، اور سپاہی نثار شامل ہیں‘۔
’شہید ہونے والے پاک فضائیہ کے اہلکاروں میں سکوڈرن لیڈر عثمان یوسف، چیف ٹیکنیشن اورنگزیب، سینئر ٹیکنیشن نجیب، کارپورل ٹیکنیشن فاروق اور سینئر ٹیکنیشن مبشر شامل ہیں‘۔
آئی ایس پی آر نے کہا ہے کہ ’شہداء کی قربانی بہادری اور وطن سے محبت کی مثال ہے، جو ہمیشہ قوم کو یاد رہے گی‘۔
بیان میں مزید کہا گیا کہ ’کسی کو کوئی غلط فہمی نہیں ہونی چاہیے: پاکستان کی خودمختاری یا علاقائی سالمیت کو آئندہ کسی بھی موقع پر چیلنج کرنے کی کوشش کا بھرپور اور فیصلہ کن جواب دیا جائے گا۔‘
