اگر امریکہ اسرائیل پر دباؤ ڈالے تو ہم ٹرمپ کے ساتھ تعاون کے لیے تیار ہیں، حماس

جمعرات کو اسکائی نیوز کو دیے گئے انٹرویو میں حماس کے رہنما باسم نعیم نے کہا کہ ان کی تنظیم نے براہ راست امریکی حکام کے ساتھ جنگ بندی کا منصوبہ شیئر کیا ہے اور آفر کی ہے کہ اگر جنگ ختم ہو جائے تو وہ غزہ کا انتظام فوری طور پر چھوڑنے کو تیار ہے۔

باسم نعیم نے کہا کہ حماس نے امریکہ کو جنگ بندی کا منصوبہ بھیجا ہے۔ اس منصوبے میں قیدیوں کا تبادلہ، اسرائیلی فوج کا انخلا، امداد کی آزادانہ فراہمی اور غزہ کی دوبارہ تعمیر شامل ہے۔ ساتھ ہی یہ شرط بھی ہے کہ کسی کو زبردستی غزہ سے نہ نکالا جائے۔

باسم نعیم نے کہا کہ وہ سمجھتے ہیں کہ ٹرمپ کے پاس امن قائم کرنے کی طاقت اور نیت ہے۔ ان کا کہنا تھا کہ ’اگر صدر ٹرمپ اسرائیل پر دباؤ ڈالیں تو وہ جنگ رکوا سکتے ہیں۔ ہم ان کے ساتھ مل کر امن کے لیے کام کرنے کو تیار ہیں۔‘

یاد رہے کہ حماس نے پیر کو امریکی نژاد اسرائیلی یرغمالی ایڈن الیگزینڈر کو رہا کیا تھا، جس دن ٹرمپ مشرق وسطیٰ کے دورے پر تھے۔ حماس نے کہا ہے کہ وہ امریکہ سے براہ راست بات چیت بھی کر رہے ہیں۔

حماس نے کہا ہے کہ ہم ٹرمپ انتظامیہ سے اپیل کرتے ہیں کہ وہ اس جنگ کو ختم کرانے کی کوششیں جاری رکھے۔حماس نے یہ بیان اس وقت دیا جب اس نے اسرائیلی فوجی ایڈن الیگزینڈر کو رہا کیا، جو اکتوبر 2023 میں حماس کے حملے کے دوران گرفتار ہوئے تھے۔

اسرائیلی حملوں میں اب تک 50 ہزار سے زائد فلسطینی مارے جا چکے ہیں اور غزہ کا بڑا حصہ تباہ ہو چکا ہے۔ مارچ سے انسانی امداد پر پابندی کی وجہ سے قحط کا خطرہ پیدا ہو گیا ہے۔

ادھر امریکہ اور حماس کے درمیان براہ راست بات چیت کی خبروں پر اسرائیلی حکام ناراض دکھائی دیتے ہیں۔ اگرچہ حماس امن کی بات کر رہی ہے، لیکن وائٹ ہاؤس کے مطابق ’حماس نے ابھی تک سنجیدگی سے جنگ ختم کرنے کی کوئی کوشش نہیں کی۔‘امریکی سکیورٹی کونسل کے ترجمان کے مطابق کہ ’ٹرمپ نے حماس سے ہتھیار ڈالنے کا مطالبہ کیا ہے۔ حماس اب بھی کئی یرغمالیوں کو، جن میں امریکی بھی شامل ہیں، غیرقانونی طور پر قید میں رکھے ہوئے ہے۔ ان کے رویے میں کوئی تبدیلی نظر نہیں آ رہی۔‘

اگرچہ اسرائیل کی کارروائیوں میں ہزاروں حماس جنگجو مارے جا چکے ہیں، مگر تنظیم اب بھی غزہ میں موجود ہے اور جنگ بندی کے کسی بھی معاہدے میں ایک اہم فریق ہے۔

اسرائیل نے حالیہ ہفتوں میں اپنی فوجی کارروائیاں تیز کر دی ہیں اور امداد کی تقسیم اور غزہ کے بڑے حصے پر کنٹرول حاصل کرنے کی کوشش کر رہا ہے۔